政情：藝團轟西九發展似公園
西九文化區搞咗咁多年都仲係十畫未見一撇，西九管理局同藝團關係又搞極都搞唔好，尋日立法會請咗班團體嚟講吓對西九最新發展嘅期望，好多團體都趁機同議員狀告西九不是，猛鬧依家西九似係做公園多過做文化區，其中八和會館副主席阮兆輝就最好火，炮轟西九一再拖延同「用人唯外」。進念二十面體行政總監胡恩威仲慨嘆同西九唔係夥伴關係喎。無藝團支持，西九發展真係好難睇好。
阮兆輝話，西九三揀一竟然揀着最無文化藝術個性嘅方案，西九隨時只係變成一個大型海濱公園，真係極度可悲可笑，佢又唔明點解西九行政總裁一定要假外求，好似本地無人才咁，到搵得人嚟仲要等佢適應香港，真係荒謬之至。佢話唔滿意西九發展一再拖延，搞到工程費用愈嚟愈貴，惡性循環落去，隨時令西九因為唔夠錢起而又再押後。
議員揶揄意見墮黑洞
其實團體已經好多次去立法會講西九願景，尋日好多意見都耳熟能詳，好似優先建中小型場地、加強藝術教育、培育更多本地觀眾、同現有藝團合作推廣文藝活動等，但有議員都忍唔住揶揄有個「西九黑洞」，團體嘅意見都唔知聽咗去邊。
議員問起覺唔覺同西九管理局係夥伴關係，餘怒未消嘅阮兆輝就話唔好問佢，要問就問西九當唔當佢係夥伴，胡恩威講白啲，話如果係夥伴，藝團就唔係對住啲官同管理局高層坐，而係坐埋同一陣線，一齊答議員問題啦！
胡恩威都好不滿文化區變公園，唔單止西九公園同啟德公園好似重疊咗，政府仲有意無意咁將文化界嘅需要同巿民需要對立起嚟，其實文化界呢一刻嘅訴求好簡單，就係要當局交代中小型場地嘅比例同落成先後次序，及確保本土文化藝術有足夠空間發展。
西九管理局同政府代表聽完團體講一大輪，最終都無乜大反應，只係話正諮詢緊唔同團體，睇吓有啲咩嘢需求係最殷切嘅，至於西九新掌舵人？咪都係嗰句：招聘工作正全速進行，相信快將可以公布人選囉。