中環出更：朱鄧麗萍母女品味大不同
母女同心，但係喜好就未必一致，好似成日行孖咇嘅太子珠寶鐘錶執行董事朱鄧麗萍，同佢做歌星嘅囡囡朱紫嬈，感情好到不得了，但講到扮靚，佢哋嘅喜好就好唔同。早前見佢哋「兩姊妹」一齊入馬場，朱太攞住個四平八穩嘅黑色Chanel手挽袋，紫嬈就用紅色Dolce & Gabbana襯佢一身型格打扮，兩個嘅品味可謂南轅北轍。
朱太係Chanel粉絲，鍾意佢款式夠簡單低調，加上黑色容易襯衫亦唔怕污糟，所以好啱佢心水。最重要嘅係，呢個袋容量夠大，可以放得晒眼鏡、電話、鎖匙等細軟，同埋可以袋埋佢出街必備嘅頸巾，遇着要返工仲可以袋埋文件添﹗你話幾方便呢？至於囡囡就鍾意小手袋方便襯衫，所以朱太都笑言好佩服囡囡嘅收納大法。難怪朱太雖然熱愛Chanel，但係經典嘅2.55同Classic flap bag，朱太都覺得佢哋太小巧玲瓏而無收集。
歐元「平咗」 赴法掃貨
講開又講，朱太成日要飛去歐洲睇錶展，佢嗰日拎住嗰個都係佢前排去法國買嘅，嚟緊佢又會過去睇網球公開賽，朱太話會乘機去買袋，事關依家歐元平咗，圍起上嚟七折有售，抵過香港買，認真精打細算。