中環出更：陀飛輪手機 內地客爭住買
二百八十萬元，足夠買層安樂窩。鐘錶專家靈機一觸，推出全球首部陀飛輪手機「LeDIX」，售價二百八十萬元，確係令人驚訝，但手機一登場就被內地豪客捷足先登搶購。引入LeDIX嘅太子珠寶鐘錶主席鄧鉅明話，內地貴客購千萬手錶都唔使眨眼，一部二百幾萬嘅手機，認真濕濕碎！
港獲配售10部
首部由法國製造嘅Celsius品牌LeDIX手機，日前登陸香港。身為本港獨家銷售商嘅鄧鉅明同執董朱繼陶，齊推介新手機。LeDIX手機好搶手，到港嘅兩部，早已名花有主，嚟緊仲有兩部，都被人預訂埋。鄧鉅明話係意料中事，內地豪客買奢侈品絕不手軟，香港今次獲配十部LeDIX，不愁賣唔出。
太子珠寶鐘錶連手機都賣埋，鄧鉅明話，近年租金升幅驚人，齋賣名錶唔係辦法，所以嚟緊會引入更多高檔奢侈品，增加盈利。
到底LeDIX手機有幾巴閉呢？Celsius行政總裁Edouard Meylan話，LeDIX手機喺電話功能外，獨立加上一個機械機芯，部機分別有鈦金屬及碳纖維兩款，屏幕採用藍寶石水晶，全球限量發售十八部。客人亦可選擇喺手機鑲上鑽石，價錢就另議嘞。