懶蟲出沒注意　蛇官為患人間

呢嗱嗱，本報記者直擊秀茂坪有一間長者屋被蛇王警員利用作為偷懶鐵竇。一眾警員每日川流不息進入長者屋客廳，有人睇報紙，有人玩手機，有人食消夜，有人甚至呼呼大睡，工作時間幽會周公。記者直擊六個半小時之內，四名警員三次進入鐵竇，休息時間最長三粒鐘。好明顯嘞，呢六個半小時只不過係冰山一角，蛇警數目不知凡幾。

蛇王偷懶已經唔啱啦，衰得佢吖，有部分警員竟然以借廁所為藉口要求居民提供大門密碼，直情係濫用職權。警員進入鐵竇蛇王仲衍生另一個問題，你知啦，長者屋入夜之後非常之咁寧靜，警員出出入入吹水食嘢都會製造噪音，絕對係擾人清夢嘅缺德行為。

香港警務督察協會主席廖潔明就話嘞，前線警員長期逗留長者屋實在不合理。有警隊中人透露，現時前線警員多數只巡旺區，其他閒區嘅警員留守警署，接獲召喚先至出動，所以有警員會喺巡邏路線附近搵蛇竇，方便接獲召喚即可現身。

計功夫茶話齋，理得你有乜嘢狗屁理由吖，總之蛇王偷懶就係唔啱，納稅人嘅血汗錢唔係要嚟養懶蟲。咦咦咦，咪住先，警隊出懶蟲會唔會係監管不力嘅惡果？好似○九年咁吖，三十名警官以開會為名，調動理應巡邏嘅水警輪送去蒲台島食海鮮歎世界，仲要開懷暢飲大量酒類飲品，其後涉嫌扶醉上班。既然警官都偷懶咯，前線警員咪學到壞一壞囉。

唉，講到尾，整個特區政府嘅官場文化都係有問題㗎嘞。就以食環署為例吖，出晒名偷懶成風，不斷有職員蛇王斷正。審計署計過數㗎喇，食環署平均每名員工每年請九日病假，高過整體公務員接近一倍。為乜要請咁多病假呢？莫非病魔唔止針對局長高官，仲要玩殘基層人員？當然唔係啦，呢家嘢即係俗稱「射波」嘅蛇王行為，病係假嘅，懶係真嘅。

功夫茶奉勸警隊一哥曾偉雄，曾氏宗親會成員曾蔭權同曾俊華就話抱殘守缺等收工啫，作為香港儆惡鋤奸最高負責人，冇理由同樣以夕陽政府嘅心態捍衞法紀。如果唔從速整頓警隊大懶蟲，後果真係可以好嚴重㗎！

懶蟲出沒注意，蛇官為患人間，煩請三曾捉蟲，千唔該萬唔該！