一年一度的太平清醮吸引逾五萬名市民及遊客專程入長洲觀賞盛事，但「平安包」風波令有關節日失色，皆因食環署官僚作風累事，刁難大會指定的兩間老字號包店，警告它們不可在街外為平安包蓋印及擺賣。「功夫茶」兩句話便道出庸官的無能：「千秋大業管不了，長洲賣包管死了。」其中一間包店毅然暫停營業，以示不滿；另一間則午後才擺賣，結果搞到秩序大亂，店主迫於無奈一樣要在店外為平安包蓋印，才可稍稍疏導買包人潮。
講真，打個印有幾咁唔衞生啫？講衞生，食環署努力啲捉多幾隻老鼠更實際。老朽知道，好些民間傳統其實係一種生活智慧，唔通真係食過平安包就長年唔需睇醫生咩？求心之所安而已。
香港在港英政府管治下，都知道要尊重傳統文化和習俗，當年新界理民官都懂尊重華南農村嘅生活特色。查實啲理民官雖然多是來自牛津、劍橋的人類學家，但佢哋反而明白批評不是「隨地吐痰」，是要認真地、設身處地、同情換位地去考究不同文化、習俗的特色，並非野蠻執法，一句「唔合衞生」便將幾十年相安無事的賣包封殺，遊客見唔到一個個即時蓋印嘅包，又影唔到相，你話幾掃興！
食環署的刁難，除了管死「非物質文化遺產」，也告訴大家：「任何一種粗率的輕視，背後總有一種無知；任何一種匆忙的論斷，背後總有一種鹵莽。」食環署一眾庸官，你們改變不了環境，那就改變自己，調校一下態度，不要「隨地吐痰」扼殺文化生機。