由廠商會立法會議員林大輝牽頭成立嘅C18並非政黨，組織本來就相當鬆散，所以今次出現兄弟鬩牆嘅場面絕對唔出奇，但最奇係方平取得建制派陣營嘅二十票不特止，仲要攞多八票泛民嘅支持。葵青區會內約有十六位泛民區議員，即係有一半人支持咗方平呢個委任議員。
泛民主派一向都反對區議會委任制，莫講話支持委任議員做區會主席，就連政府委任區議員，佢哋都覺得罪大惡極。記得民主黨中西區區議員甘乃威，曾喺○四年為咗做區會主席而支持委任議員胡楚南做副主席，結果最後喺壓力下被迫辭去主席職務，今次葵青區泛民議員大規模公然支持委任議員做主席，泛民各黨派高層係咪應該做啲嘢調查吓呢？