政情：方道生曾考慮私家執業
最近好多公立醫院醫生都大逃亡，走去私人執業搵真銀，原來屯門醫院腦外科主管方道生都有諗過「劈炮」唔撈。去年菲律賓馬尼拉挾持人質事件頭部受傷嘅梁頌學（Jason）返港後，方道生一直擔任Jason嘅主診醫生，市民亦加深對方醫生嘅認識，如果佢出去私人執業，肯定長做長有，但佢都寧願留喺公立醫院服務，點解呢？
方醫生喺公立醫院默默耕耘卅幾年，醫院管理局尋日就向佢頒發「傑出員工獎」，以認同佢多年來嘅貢獻。公立醫院人手短缺兼壓力大，方醫生自爆曾經因為做到冇癮想「劈炮」，但礙於呢個諗頭源於一時嘅情緒起伏，加上佢自嘲冇冒險精神，擔心唔適應私人執業嘅轉變，而且私營市場未必有好嘅團隊同佢合作，所以諗吓就算。
講起Jason，方醫生話Jason康復進展緩慢，學行、學企，學緊適應日常生活，但唔知幾時可以出院。方醫生坦言，佢最怕唔係醫Jason個病，而係透過傳媒同七百萬香港人講Jason嘅病情，因為可能涉及病人私隱問題，所以佢承認向傳媒講病人嘅病情係越咗位。