政情：佳叔談干預政策講大咗
中國社會科學院早前發表新一份《中國城市競爭力報告》，直指香港嘅競爭優勢已逐漸被內地城市超越，並公開呼籲港府放棄奉行多年嘅「積極不干預」政策，改行「積極地有限度干預」添。言論一出，即時引起社會廣泛討論，仲觸動到身為「港府智囊」中央政策組首席顧問劉兆佳嘅神經。
話政府廿年冇提過
佳叔尋日代表策略發展委員會召開記者會，佢煞有介事咁提起近期有人促港府放棄「積極不干預」政策，但斷言港府早喺過去廿年已經冇再提，話港府嘅角色會隨住經濟環境而改變，佢仲引用九八年港府高調入市來做例子。其實煲呔曾喺十年前仲做緊財政司司長時，都仲係強調緊「最少的干預」，佳叔今鋪似乎講大咗喎，莫非又係當年「八萬五」房屋政策唔存在嘅翻版？
佳叔早前突然入院做手術，至今仍未公布所為何事，大家都擔心佢嘅健康狀況。不過，佳叔尋日就極之風騷話自己經已好番晒，笑言記者問嘅係「過咗去」嘅問題喎。