政情：梁美芬「竄改」禪讓歷史
選舉臨近，各類新組織紛紛以不同名義成立。專業會議三名立法會議員何鍾泰、劉秀成同梁美芬，連同一批主要來自建築同工程界嘅專業人士，組成「大舜政策研究中心」，仲搵嚟政壇元老、前行政會議召集人「大Sir」鍾士元擔任顧問，尋日舉行發布會同大家打個招呼。佢哋強調成立該組織純粹想為香港出謀獻策，唔係作為選舉造勢機器，亦冇接受中方任何幫助。
問及點解選擇以中國古代皇帝大舜嚟為組織命名，主席何鍾泰透露個名係由「大Sir」改嘅，因為研究中心主打工程同規劃議題，最初諗住用出名治水嘅大禹，但又覺得唔多好聽，於是就改用將帝位禪讓畀大禹嘅大舜。
誤會大舜生大禹
出任副主席嘅梁美芬之後補充，話研究中心第一炮就係講測試水質，而大舜又係大禹嘅爸爸，所以覺得好合適。吓？既然講得係禪讓，大舜又點會係大禹嘅阿爸呢？咁就變咗係世襲制喇！翻查歷史，大禹嘅爸爸應該叫做鯀，因治水無方畀大舜殺咗。梁博士講法律就叻，不過似乎要惡補中史喎。