政情：林煥光大執平機會
喺剛過去嘅禮拜二，馬場舉行咗場香港傷健策騎協會盃賽，平等機會委員會主席林煥光拖埋太太出席，表現得非常輕鬆寫意，本身信佛嘅佢，仲趁當日係佛誕大講佛學研究。照計平機會近年屢爆醜聞，作為主席嘅佢理應好唔得閒，點解會有閒情逸致攜眷現身馬場講佛經呢？原來佢早已將前平機會主席鄧爾邦遺留落嚟嘅大堆惡行同蘇州屎，掃晒落垃圾桶同地氈底！
平機會過往嘅惡行真一匹布咁長，點數都數唔晒，當中最離譜係代表一名抑鬱症及妄想症患者入稟告《太陽報》同東方報業集團，指○六年一篇專欄文章涉嫌中傷精神病患者，觸犯《殘疾歧視條例》。幸好區域法院喺今年一月還東方一個公道，裁定有關指控唔成立，不過東方最後都要承擔自己嘅訟費，極之唔公平。
林煥光上月八日接受網上電台「香港人網」嘅節目《人民力量》訪問時，主持人立法會議員陳偉業（大舊）就質問佢，平機會係咪刻意針對某啲報紙傳媒，就同一篇報道告一間又唔告另一間，涉嫌選擇性檢控。大舊又指出，一般嚟講都係打輸官司一方要支付埋勝方嘅訟費，但現行歧視條例就規定涉及歧視嘅訴訟，無論結果係點都要各自承擔訟費，唔公平兼會引發好多惡意嘅訴訟。
承認各付訟費或致惡意訴訟
對於玩針對嘅問題，林煥光嘅回應係：「（平機會成立至今）十五年我唔可以翻查晒記錄啦，但至少我嚟咗呢十幾個月，我就完全冇睇到係會咁樣去做囉！」強調平機會最多只會提供法律援助，本身冇權告人，只有投訴人先有權興訴。佢承認理論上各付訟費嘅規定可能會引發惡意訴訟，因此平機會更加要做好把關角色，只對有相當證據嘅個案提供法律援助，佢上任後提供過幾十宗法援，大部分最後都和解了事，冇真正鬧到上法庭。
林煥光雖然冇畫公仔畫出腸，但係人都知佢係暗示緊自己唔認同上手鄧爾邦嘅做法。其實鄧爾邦任內除咗選擇性針對傳媒之外，自己又管理不善同亂花公帑，先後畀審計署同立法會炮轟，留低大堆蘇州屎畀下手執手尾，林煥光自然唔妥佢喇！希望林煥光會真真正正進行改革整頓，徹底清走鄧爾邦時代嘅遺毒，帶領平機會行番正途，唔好再浪費納稅人公帑亂告人。