中環出更：彭徐美雲坐正向夫請大假
成功女人背後，唔少得一位默默守護佢嘅男人。彭徐美雲（Josephine）上任女童軍總會總監兩個多星期，已向老公彭曉明請定三年大假，暫時放下家族生意，專心做公職。彭生一口答應，仲支雙倍人工畀太太，認真唔話得。
Josephine履新後，尋日首次同傳媒聚會，透露滿腹大計。今年係女童軍九十五周年，唔少得出版紀念特刊，七月又有一系列女童軍工作坊，教佢哋扮靚及社交禮儀。
為瞓身女童軍，Josephine連家族生意都「借歪」。佢同老公夾手夾腳開雨衣廠多年，不時穿梭中港及外地傾生意，但佢上任女童軍總監後，決定全情投入。Josephine話，幸好大仔Victor非常叻仔，跟爸爸打理家族生意五年，已獨當一面。彭生深明太太做總監後應酬多，開支多，出夠雙倍人工以示支持。
做女童軍可醫公主病
香港女仔經常畀人話有公主病，Josephine都認同，但佢話眼見唔少女童軍經過訓練後，變得有團隊精神，證明參加女童軍係治療公主病最佳良方。