中環出更：「克己讓人」林亮活得自在
南海佛山一帶臥虎藏龍，盛產唔少武術家，曾經喺南海家鄉習武嘅立法會議員林健鋒（Jeffrey）爸爸林亮，繼承師傅嘅「任他強」哲學，結果老友處處，同樣老友多嘅Jeffrey，唔知係咪都係繼承咗師公嘅真傳呢？
南海同鄉總會就職禮
香港南海同鄉總會前晚舉行就職典禮，喺灣仔會展筵開六十三席，對家鄉感情深厚嘅林亮一早到場湊熱鬧。年屆八十七歲嘅林亮，非常精靈，事關卓妮去年底喺玩具展同佢交談過，事隔五個月佢到依家都仲記得，記性非常好。講開小時候喺南海嘅生活，佢更加係如數家珍。
林亮活得開心自在，無樹敵亦無仇人，佢話同佢當年返南海學武有直接關係，事關佢師傅喺武館掛咗一對對聯：「克己讓人非我弱 全心守道任他強」，呢個係佢師傅嘅做人哲學，林亮當作自己嘅座右銘，即使後來林亮嘅師傅喺香港授武遇人挑戰，佢都「任他強」，唔同人比試。嚟緊林亮仲會帶一百名中學生返南海交流，佢慨嘆時下年輕一代受唔到苦好難教，所以想帶佢哋返去體驗吓喎。
至於九六年擔任南海區榮譽巿民嘅葉劉淑儀話，佢都有深厚嘅家鄉情意結，雖然唔得閒返去，但佢都將祖屋執到靚一靚，仲有堂哥幫佢睇住添。嚟撐場嘅仲有異鄉人中華總商會榮譽會長霍震寰及裕華國貨董事副總經理余鵬春，余生話佢哋公司嘅紫檀同花梨木傢俬，仲有石灣陶瓷都係來自南海，大家合作愉快。
霍震寰就嚟撐今年連任第三屆嘅理事長鄧祐才。鄧祐才話，理事長最多只可做兩屆，但因為未搵到合適人選，所以由佢冧莊，佢話希望可以搵到合適人選做接班人喎。
