中環出更:施榮懷撐世姪拉隊歎意菜

近年急速竄起嘅米芝蓮星級意大利菜食肆「The Drawing Room」,愈來愈受城中饕客追捧。早前中華廠商聯合會副會長施榮懷呼朋喚友去幫襯,力撐股東之一嘅世姪梅慶豐(Jeffrey)。Jeffrey父親、廠商會會董梅應春夫婦出席熱情招呼,同好友分享囝囝嘅成就。美食佳餚當前,成班兄弟開懷暢飲,不知幾快活。

當晚出席開心派對嘅沙煲兄弟有十幾人,包括有「磅王」稱號嘅廠商會會董查毅超、副會長吳永嘉,施榮懷胞弟、東華三院總理施榮恒都有現身。

至愛深海紅蝦扁意粉

梅應春同施榮懷囝囝係同月同日生,所以兩人惜緣上契,十幾年來兩家人交往緊密,感情深厚。

Jeffrey精心安排嘅新派意菜,徹底征服一眾嘴刁嘅大男人。施榮懷至愛鎮店之寶「西班牙深海紅蝦扁意粉」,盛讚意麵鮮甜彈牙。Jeffrey就極力推介頭盤「香煎鵪鶉伴鵝肝」,多層次嘅口感冇得彈。梅太同老公已經試勻晒所有經典菜式,當晚一於試吓新菜「千層鱸魚伴意大利青瓜」,一樣食到讚不絕口。查毅超食到欲罷不能,即時訂枱同老婆撐枱腳,點知訂位嘅情況真係爆到七彩,連老細都幫唔到佢。

Jeffrey話,佢自細同父母周圍去旅行搵美食,加上媽媽煮嘢食好叻,所以引起佢對飲食行業嘅興趣,遂於兩年前同老友合資闖天下,估唔到一鳴驚人,賭王何鴻燊及許晉亨夫婦都係捧場客,生意好到不得了。

梅太Judy話,囝囝完全用自己嘅積蓄投資餐廳,冇同父母攤大手板,做到咁嘅成績,佢深感欣慰。梅應春成晚笑不攏嘴,卓妮問佢畀囝囝幾多分,佢笑而不語。睇佢個樣冧到爆,仲使問?

卓妮

Money18免費即秒股票報價網站現推出8升級功能,財經資訊,實時實發!