政情：張子欣年薪千萬人仔
內地金融機構二○一○年度嘅年報近日相繼出籠，有人心水清仔細統計，發現喺Ａ股上市公司當中，年薪最高嘅係中國平安嘅執行董事張子欣，佢嘅年薪，高逾一千零六十七萬元人民幣（稅前），亦係唯一身價喺千萬元人仔以上嘅高層管理人員。排第二位嘅係平安董事長兼首席執行官馬明哲，剛卸任嘅廣發證券董事長王志偉就排第三位。
有高位當然有低位，而喺公司領取薪金最「寒酸」嘅要數如意集團嘅董事長秦兆平，僅有董事津貼二千五百元人仔，兩者差距超過四千倍。如意集團做紡織業起家。
喺公司畀高管薪酬嘅總額數嚟睇，廣發證券成為「新貴」，以逾七千二百零九萬元人仔列榜首，民生銀行同中國平安則緊隨其後。喺榜尾嘅係雲鋁股份，向班獨立董事發放咗二萬五千元人仔。若果以人均薪酬嚟睇，廣發證券以逾三百六十萬元人仔同樣高踞榜首，而雲鋁股份人均只有一千元人仔，兩者差距三千六百倍。