中環出更：蔡志明情迷愛彼錶20年
趁五一勞動節紅假，城中名人尋日去沙田馬場消遣吓。馬場尋日有一場「愛彼錶女皇盃」賽事，吸引愛錶之人聚首一堂。玩具大王蔡志明一家齊撐場，原來佢係愛彼錶忠實擁躉，廿年前迷上第一隻，至今珍藏嘅愛彼錶，有幾十隻咁多。
放假日，馬場人頭湧湧。蔡生早前將喜運佳錶行收歸旗下做老闆，講起名錶就雀躍。佢盛讚愛彼錶夠豪邁，戴起鑲石男裝錶，感覺好Man。廿年前佢以七萬多元購入第一隻，自此不能自拔。公子蔡加讚亦愛鑽研名錶，早前同家姐加怡出席瑞士巴塞爾鐘錶展，大開眼界。
發叔贏馬袋2萬
鍾意愛彼錶嘅，仲有愛沙尼亞名譽領事林建康夫婦，林太戴上閃閃生輝愛彼錶入場，盡顯貴氣。隻錶係老公送嘅，難怪林太講起就心甜。
數全場最happy，非鄉議局主席劉皇發莫屬。佢公子劉業強首次派名駒「驌龍」上陣第一場，竟以半冷姿態勝出，袋逾三十六萬元獎金，發叔又中埋連贏位，袋多兩萬元。
「驌龍」呢個名好少見，卓妮一度畀佢考起。發叔解畫話，「驌」與「肅」發音相同，古代有典籍提及「驌驦」，即係良駒駿馬嘅意思，「驌龍」呢個名，係囝囝改嘅。卓妮翻查資料，發現「驌驦」呢個詞語，最早出現喺春秋戰國時代。睇嚟，劉公子有啲文彩噃。
同場仲有青年事務委員會主席陳振彬（Bunny），復活節期間，佢帶咗班後生仔返北京及河北考察新能源設施，勞碌奔波，日睡三小時，結果患上大傷風。
莎莎老闆郭少明就同太太去完歐洲出席美容展。美容科技日新月異，郭生話，唔睇好易Out喎。佢又透露，有意進軍健康食品市場，太太身先士卒，試食唔同產品，果然瘦咗喎。
卓妮