復活節長假期話咁快就過去，唔少立法會議員外遊後紛紛回巢，好似新民黨主席葉劉淑儀就約埋朋友齊齊去上海玩四日，除咗食傳統上海菜，仲狂掃旗袍，行程咁好玩，難怪葉太冇囡囡陪住都可以笑逐顏開啦！
吸引葉太視線嘅係由台灣進駐上海嘅龍迪旗袍，葉太話無意間發現咗呢間舖，鍾意龍迪有好多唔同款式及刺繡嘅旗袍選擇，加上佢哋有大量現貨，只要度身後再稍作輕微修改即可帶走，非常方便。葉太大讚龍迪啲旗袍平靚正，搞到平時買嘢好節制嘅佢，都瘋狂掃咗四件返香港。
除咗行街買嘢，葉太仲去過上海置地廣場，又趁機行埋國際車展，佢似乎對林寶堅尼新跑車情有獨鍾，仲特別同Spyker跑車合照，但佢話名車太貴，只可遠觀而不可褻玩喎。期間葉太參觀過上海嘅創意產業，覺得好值得香港參考，睇嚟佢始終放唔低香港嘅工作。