政情：楊位醒猛呻請人洗碗難
專業人士及精英匯聚嘅「香港專業及資深行政人員協會」，該會應屆理事會成員尋日相約傳媒聚會，除咗會長胡曉明（Herman）、創會會長容永祺及一眾核心理事助陣外，仲難得見到會員之一嘅香港餐務管理協會主席楊位醒。醒哥係飲食業嘅老行尊，面對最低工資實施，佢慨嘆好多食肆想請個專業洗碗工人都好難，就算出到八千元月薪都無人肯做。
醒哥話，以前新移民為洗碗工種提供唔少生力軍，但現時就無乜人肯做，好彩仲有好多少數族裔肯屈就，所以好多食肆都鍾意請佢哋工作。正所謂「家家有本難唸的經」，請人洗碗難，專資會招攬人才一樣難。Herman話，現時專資會有六百名會員，雖然佢想招攬多啲人才入會，但仍要保持入會高門檻準則，確保會員質素。
Herman坦言，佢兩位讀緊博士嘅公子都未夠資格入會，事關佢哋仲喺美國讀書，點都要等畢業同累積工作經驗後先可以考慮推薦佢哋入專資會喎，證明專資會制度係一視同仁嘅。