政情：棠哥倡設高官病情申報
港府今年唔知係咪流年不利，問責高官接連倒下，教育局局長孫明揚最新亦被揭罹患腎病，再次引起社會對高官健康及工作能力嘅關注。早前曾受頸椎移位困擾嘅行政會議成員兼工聯會會長鄭耀棠，做完手術後尋日強勢復出，仲以過來人身份話患病真係好慘，希望市民多啲關愛高官，唔好畀咁大壓力佢哋，但亦倡議港府主動成立申報制度，釋除市民疑慮喎。
由去年九月開始飽受頸椎移位之苦嘅棠哥，一度痛到行唔到，仲由原本嘅七十七公斤，暴跌到六十六公斤。不過，佢尋日同傳媒聚會時，已經完全好番晒，唔單止健步如飛，講嘢亦同以前一樣咁生鬼。講起孫公最近被揭發要定期洗肚（腹膜透析），大病初愈嘅棠哥似乎相當感觸。佢話高官都係人，但承受嘅壓力比民間大得多，市民應該多啲體諒佢哋，「最慘係成日有人話佢哋每個月
成幾十萬人工……你話幾大壓力！」
「講出嚟真係好大壓力」
話雖如此，棠哥亦認為佢哋坐得如此高位，市民要求佢哋對外交代病情係好合理，所以港府應該建立一套制度，要求立法會議員、行會成員同高官申報病情，以及請來醫療專家為佢哋評估健康情況。棠哥強調，當初自己好早已經向行會交代病情，但亦坦言，港府點樣喺病人私隱同公眾利益作平衡會係非常困難嘅事：「講咗出嚟真係好大壓力㗎，一日幾個電話打嚟問你情況點，真係煩死，如果病人當自己冇病，做嘢都龍精虎猛啲！」
「老愛國」前港區人大吳康民早前罕有地獲國務院總理溫家寶單獨接見，引來各方揣測。不過，同屬愛國愛港陣營嘅棠哥尋日就話，唔覺得今次會面有乜特別含意，認為純粹係溫總對康叔一生從事愛國教育事業嘅肯定，同特首選舉無關。棠哥仲話，今次會面只係康叔單方面向外發放相片及新聞稿，並唔係官方所出，又直言自己有時見咗領導人後，都唔會發相，低調到不得了，言下之意，莫非係寸康叔今次太高調？