中環出更：一哥正能量灌輸年輕人
日本核輻射好似海嘯殺到香港咁，沖冧咗唔少日本餐廳，連「一哥」楊貫一旗下間「八重菊」日本料理都斬纜唔玩，轉型做西餐廳。不過，香港係飲食天堂，和食以外仲有好多地方名菜選擇，好似來自浙江省嘅名人食府《文鼎壹號》，早幾日落戶香港開業，一哥都有出席湊熱鬧，期間講起自己間「八重菊」結業，佢啲朋友都讚佢夠決斷喎！
縱橫飲食界幾十年嘅一哥見慣風浪，處變不驚，佢好淡定話，世界不斷在變，船到橋頭自然直，所以寄語時下年輕人，唔好怨天尤人，最緊要做好自己本分，仲語重心長話，一堆老鼠放喺一個籠入面，一日一餐都過到好日子，環境再差都生活到，勉勵年輕人要有建設先係最重要。
禤國全無懼日本團慘淡
和食成為重災區外，日本旅行團亦少咗好多，東瀛遊執行董事禤國全話，現時日本團生意跌咗九成，但對佢哋生意影響唔大，事關旅客都會照出門，只係轉去其他地方啫，加上佢哋旗下九成店舖都係自置物業，唔使捱貴租，所以無有怕喎。