探射燈：昏庸政府激發勞資矛盾
由曾蔭權一手策劃的最低工資將於下月一日出籠，惟條例模糊不清，政府更將飯鐘錢、假期錢「推莊」要由勞資自決，令勞資雙方爭拗不斷，形成「天下本無事，庸人政府自擾之」的局面。為符合法例，有僱主要將雙糧攤分作月薪，變通求存，員工加薪變減薪；但員工加人工亦未見開心，因為終日憂慮年紀大及低學歷而遭裁員，寧願減薪保職位。社會學家分析指，政府推行最低工資為好心做壞事，弱勢社群的議價能力不但不會提高，反而扼殺其就業機會，演變成僱主成本增加，低下階層淪為失業大軍。
「最低工資到底點計，我仲係矇查查，雙糧到底計唔計呢？我都係取消雙糧計埋落每個月嘅人工度啦！」張先生在大埔區經營電器店已近四十年，全店請了三個兼職員工及一個長工，以長工的現時月薪計算，雖然包飯鐘及假期，並有花紅及雙糧，但卻低於最低工資規定的時薪二十八元，與三個兼職員工一樣，在五月一日後須調高薪金。
張只好將雙糧攤分作為月薪發放，以符合最低工資的要求。「冇雙糧梗係冇咁有人情味，員工士氣都會低落啲，但僱主真係未必負擔到又畀雙糧又加人工，尤其係我哋呢啲舖頭仔。」張慨嘆，現時的經營成本不斷增加，租金及工資也愈來愈高，未來的貨品亦有加價壓力，近月零售市道疲弱，三至四月期間，營業額下跌兩成。
沒有僱主願意被標籤無良，但經營壓力卻迫使他們必須精打細算。張先生雖然解決了員工的最低工資問題，但他直指：「最低工資係好心做壞事，搞死晒低學歷人士，如果我出廿八蚊時薪，我相信有好多人可以揀，最終都係搞到啲低競爭力嘅人冇嘢做！」
圖／文：專案組
寧減薪保住份工
僱主加人工，但受惠的員工卻憂心忡忡。今年六十歲的珠姐現時在一間中式酒樓任職傳菜員，人工六千四百元，每天工作十小時，扣除假期，時薪二十五元六角。
五月一日後，珠姐的薪金會加至七千多元，但珠姐坦言「好驚會被炒，七千幾蚊人工，老細已經請到後生仔女代替我哋。」
珠姐表示，原本全公司有四名傳菜員，早前有人離職，公司不再請人，傳菜工作現時由三人負責，樓面亦要協助傳菜，相信公司希望任由職員自然流失，「如果要炒我，我其實寧願收少啲人工，都想保住份工。但係立咗法，唔係你話想收少啲錢就得。老細依家未話要炒人，所以都係見步行步。」
毅進生憂慮前途
而廿三歲的阿文在完成毅進課程後，在屯門做髮廊學徒，月賺四千元。但五月的最低工資實施後，他對前途充滿憂慮，「最低工資法例生效之後，人工多咗，可能加到八千蚊，但幫襯嘅人流不變嘅話，髮廊會承受較大嘅財政壓力，影響僱員薪酬議價能力，及削減員工數目，受苦嘅又係班員工。」
事實上，僱員僱主的衝突亦不僅於此，有僱主竟然向不受最低工資影響的員工出招，有網民在討論區踢爆，至五月開始，公司須每周加工時半天，原本薪金高於最低工資的，現時變相減人工，「個死人最低工資，搞到我五月開始……星期六要返半日呀」。
飲食行業難請人
亦有從事飲食業的僱主表示難請人，咖啡店負責人鄭小姐道：「根本都請唔到人嚟做，就算畀得高過最低工資都冇用。我哋畀到九千五百蚊請個技師中工，請極都請唔到。啲人連見工都唔嚟，其實只要有人嚟見工，唔係咁差，我都即刻請。」
「政府係逃避責任，將議價拋畀勞資雙方。」理工大學應用社會科學系講師張超雄認為，最低工資法例不清不楚，有太多模糊的地方，當執行法例時，勞資雙方的矛盾加劇。而部分弱勢社群的議價能力並不會提高，最後只會扼殺其就業機會，相信在條例實施後，部分人士會面臨失業。