政情：莊偉茵勤試食條脷痹
呢個世界好公平，無論幾有趣嘅行業，工作性質都一樣係有辣有唔辣，好似國泰航空企業事務董事莊偉茵，工作範圍包括四圍飛兼試食飛機餐，聽落好似好吸引，但有時都幾辛苦。為咗幫乘客精挑細選最好嘅飛機餐，偉茵試過最高紀錄喺一個下午試食四十幾道菜，無論中西菜式、甜酸苦辣甘都試齊晒，結果試到條脷都麻木咗。
不過，脷麻都事小，偉茵最擔心係食大咗個肚腩，好彩佢生得高，肥咗少少都唔多覺，但為咗Keep Fit，偉茵幾忙都好，一星期都堅持要跑三日步，就算增加試食次數都唔使怕啦。話口未完，偉茵原定尋日下午要出發去西雅圖接新飛機返港，但出發前都特登去試食，難怪佢會擔心有肥肚腩。
其實尋日偉茵同幾個食家一齊喺尖沙咀The Mira酒店試菜，事關嚟緊國泰會同美麗華集團合作，喺五月一日及七月三十一日喺美麗華集團旗下嘅八間高級餐館，為國泰乘客提供超過九十款餐單，相信總有一款啱心水。