政情:郭位慘變「肥佬」校長

大學校長真係唔易做,城市大學教職員協會早幾日完成咗對校長郭位嘅評分,一千八百個可以投票評分嘅會員入面,有八百七十人投票,結果一如事前所料,以十分滿分,郭校長只有二點二七分,距離五分合格仲有一段距離,但較去年評分已有進步。不過,校方就唔認同呢個調查,聲言會保留追究權利添!

其實郭校長嘅評分唔算低,因為前校長張信剛喺○七年嘅評分都係得二點九分。查實點解啲校長嘅評分會一面倒咁低呢?睇番教職員協會評分問卷嘅問題,六條問題入面,有三條同教職員嘅福利、溝通、合作有關,現時大學財政咁緊絀,校長想喺呢幾方面攞高分都幾難。另外三條問題問郭位係咪關注大學嘅整體利益、可唔可以傳達大學正面形象同使命,呢部分評分自然高啲。

城大教職員協會理事馮偉華話,校方根本無同員工好好溝通,教職員協會將會約見校長同校董會成員,研究點樣搞好雙方關係。其實要辦好一間大學,管理層同前線員工合作好重要,成日互相指摘根本唔係辦法。

Money18免費即秒股票報價網站現推出8升級功能,財經資訊,實時實發!