政情：郭位慘變「肥佬」校長

其實郭校長嘅評分唔算低，因為前校長張信剛喺○七年嘅評分都係得二點九分。查實點解啲校長嘅評分會一面倒咁低呢？睇番教職員協會評分問卷嘅問題，六條問題入面，有三條同教職員嘅福利、溝通、合作有關，現時大學財政咁緊絀，校長想喺呢幾方面攞高分都幾難。另外三條問題問郭位係咪關注大學嘅整體利益、可唔可以傳達大學正面形象同使命，呢部分評分自然高啲。

城大教職員協會理事馮偉華話，校方根本無同員工好好溝通，教職員協會將會約見校長同校董會成員，研究點樣搞好雙方關係。其實要辦好一間大學，管理層同前線員工合作好重要，成日互相指摘根本唔係辦法。