政情：自由黨員退黨組T Party
自由黨近一年可謂命途多舛，雖然前排連黨徽都改埋，希望可以耳目一新，但咁都唔代表可以順順利利喎，事關有幾位自由黨黨員尋日自立門戶，成立咗個政黨「T Party」，打正旗號反對最低工資，並反對不勞而獲、不斷蠶食公帑嘅「蝗蟲」，經濟政策立場極右，好明顯係嫌自由黨唔夠激啦！
今次退出自由黨嘅有五位黨員，當中較為人熟悉嘅只有現任區議員林翠蓮，仲有佢老公馮德聰，夫妻檔上陣。馮德聰話，佢哋組黨當然要積極參選，但並非每事都向選票看，某啲理念同主張亦未必得到大部分選民歡心，但即使如此，佢哋相信好多選民都希望見到一啲硬骨頭嘅政黨喎。
林翠蓮亦稱，T Party會派出廿七人參選十一月區議會選舉。佢仲透露，幾位退黨嘅成員前晚見過榮譽主席田北俊，交代退黨理由，據講田少見大家去意已決，亦都冇再出聲挽留喎。