政情：餐廳老闆寸爆鬍鬚曾
財爺鬍鬚曾發表完「史上最廢」財政預算案後，匆匆跪地派錢求饒，可惜六千蚊不但無助平息民怨，更被外界狠批短視兼分化社會。唔少商戶喺鬍鬚曾宣布派錢後，都食住六千蚊呢條水搞宣傳吸客，但最近我哋就喺屯門發現有餐廳推出一款盛惠六千元嘅「『曾俊』感情豪『華』情侶套餐」，名義上就搞噱頭賺錢，實際上卻係打正旗號寸爆鬍鬚曾派錢博好感。究竟邊位仁兄咁高招呢？
呢間位於屯門啟豐商場嘅餐廳，日前喺窗外張貼廣告，宣傳呢個咁「別開生面」嘅情侶套餐。雖然間餐廳除咗有法國生蠔同香檳呢啲傳統西餐元素外，仲包埋北海道海膽鵝肝炒飯同日本靜岡溫室蜜瓜，連冬蟲夏草洋蔘炖湯都出埋，畀一眾情侶一次過體驗環球風味。
個餐牌就咁睇充滿惡搞成分，但餐廳老闆莊先生強調，呢個「『曾俊』感情豪『華』情侶套餐」真有其事，仲話雖然餐價要成六千蚊，但絕對冇得賺，事關真係要搵真材實料返嚟炮製套餐喎。
政策短視 小商戶難受惠
莊老闆介紹完個套餐後就開始入正題，佢話鬍鬚曾宣布派錢後，雖然市民大致上都開心，但小商戶就受惠唔多。佢狠批鬍鬚曾短視，唔明點解唔做啲有建設性嘅事，幫吓社會水深火熱嘅市民，反而選擇一鋪過派晒啲錢嚟博市民好感，而正正係因為咁，佢先決定炮製出呢個六千蚊情侶套餐，幽鬍鬚曾一默，希望用另類手法，全力宣洩對預算案嘅不滿喎。
莊老闆又笑言，個「寸爆」套餐推出至今已近兩個月，雖然唔少街坊會好奇去望吓個餐牌，亦吸引網友熱烈討論，但就無人肯預訂。究竟啲人係嫌貴，定係見到鬍鬚曾個名已經唔開胃呢？
鬍鬚曾當日為咗撲火，臨急臨忙亂開先例向市民派錢，即使依家預算案喺建制派護航下順利通過，但社會早已對佢大失信心，單睇今次小餐廳都爭相揶揄佢就知嘞。唔知鬍鬚曾有冇膽量同太太親身落區，試吓呢款以佢命名嘅情侶套餐，順便為自己種下嘅惡果解畫呢？