中環出更：梅慶豐戴耳環凸顯個性
年輕人追求率性、表現自我，都係一種獨特品味。好似中華廠商會會董梅應春囝囝梅慶豐（Jeffrey），自言凡事唔鍾意太正式，致力追求另類，無論係打扮、事業，都抱着另類主義，好似着衫一定要Mix & Match，就連耳環都要係自家設計。
卓妮日前喺一個酒會見到Jeffrey，佢係星馬菜館「海南少爺」及米芝蓮星級意大利食肆「The Drawing Room」嘅股東之一，對飲食嘅高要求唔使多講，但佢對衣着打扮亦同樣講究，當日佢左邊耳仔戴住由閃鑽鑲襯嘅黑寶石耳環，盡顯年輕人嘅真我性格。
辭工尋另類人生
Jeffrey話，佢屋企仲有幾對唔同款嘅耳環，方便輪流配搭。咁都仲未夠，幾個月前佢索性辭去投資銀行嘅工作，擺脫嚴肅、緊張嘅金融圈生活，瞓身探索另類人生，包括諗緊將兩間生意唔錯嘅餐廳擴張，或另搞新品牌，成績如何，大家就要拭目以待喇。
卓妮