中環出更：顧嘉煇獲獎葉麗儀返港撐場
有香港樂壇教父之稱嘅顧嘉煇（Joseph）尋日獲藝術發展局頒發「終身成就獎」。煇哥創作逾千首經典金曲，膾炙人口，魅力至今猶在。城中名人都係佢粉絲，紛紛到賀。久違了嘅紅歌星葉麗儀（Francis）都由澳洲返港恭賀恩師，熱鬧到極。
Francis三歲孫女唱《上海灘》
七十八歲嘅煇哥，睇嚟精神奕奕，除咗頭髮變得花白，身形未見發福。煇嫂帶埋公子顧致和（Ken）及新抱Amy齊到賀。阿Ken同爸爸走唔同路線，投身平面設計師行業，喺上海開設品牌策劃公司做老闆。佢謙稱自己唱歌唔掂，故無意做作曲家或歌星，但爸爸好開明，從小鼓勵佢「做喜歡的事」。煇哥已退休，間中仍客串為囝囝客戶創作廣告歌，過吓作曲癮。
曾與煇哥合作無間嘅Francis捉住恩師影相，兩人拍檔四十二年，幾近半世紀，一曲《上海灘》，令Francis紅遍樂壇。走下舞台，Francis已移民澳洲，以湊孫、打高球為樂。Francis話，囝囝係精算師，事業有成，不時喺家中播放媽咪唱《上海灘》嘅影碟，所以孫女只得三歲半，也學着嫲嫲腔調，唱起《上海灘》喎。
人稱「電子大王」嘅南太電子創辦人顧明均都係煇哥粉絲，兩人同樣姓顧，莫非係親戚？顧明均就擰頭話：「非也，係同姓三分親至真。」問佢有否拜師煇哥門下，顧生就怕醜話：「唱歌？我唔掂㗎！」
婦女事務委員會主席高靜芝（Sophia）都嚟為煇哥打氣，對方所作嘅曲，已熟到入晒腦，尤其喜歡《不了情》。Sophia仲自爆囡囡Anna係煇哥師妹，同樣畢業於美國波士頓嘅Berklee College of Music。囡囡近日返香港發展，專注音樂製作喎。
卓妮