新界村屋僭建問題拖延多年，主因係政府同一班新界原居民遲遲未就修例問題傾掂數，不過申訴專員公署上周發表嘅調查報告，等唔切要將呢個問題放上枱面，辣到班居民㷫合合。
有新界原居民話，政府長期搵佢哋出氣，今次仲要拆屋，實在忍無可忍，誓言聽日拉大隊衝上元朗地政總署示威，如果政府夾硬嚟，唔排除圍攻政府總部添！
有原居民透露，唔少人對申訴專員要求嚴打僭建感到極大不滿，認為係畀人踩到上心口，聽日就會有幾百個六鄉村民打頭陣，去地政總署示威抗議，希望港府盡早修例豁免清拆，如果政府實行拆屋，佢哋就拆番政府骨喎！
歷史話畀我哋知，凡係牽涉原居民利益嘅事，如當局處理不當，隨時都可以搞到好大鑊。好似○一年環保署否決九鐵落馬洲支線貫穿塱原濕地，但冇同時提出賠償方案，搞到時任村長簡炳墀就聲言要「撒石灰」趕蟲。而○六年政府沒收新界居民嘅私養家禽，幾十名居民代表就齊齊衝上禮賓府放雞。由此可見新界人出手，真係一啲都唔簡單！