政情：阿涂逼警改「急口令」
立法會保安事務委員會主席涂謹申向來關注警方執法問題，除咗每年提議案剔除警方嘅線人費、投訴警察課同反恐秘密開支，連警方每次拉人都要背一次嘅警誡詞：「唔係是必要你講……」佢都覺得好有問題，認為會誤導咗啲被捕人士，以為保持緘默係唔啱嘅，早喺五年前已經要求警方檢討。
最近阿涂正式提出一句新「急口令」，建議將警誡詞改為：「根據法律，你有權保持緘默，保持緘默不會對你構成不利。如你自願作供，供詞將予紀錄，且或會成為呈堂證供。」總共有四十五隻字，比依家用開嘅多七粒字，而且噏落仲冇咁順口，要全港近三萬名警員重新受訓由頭背過，肯定勁麻煩同會鬧出笑話。
警方就話，呢句新「急口令」可能引發其他問題，加上現行警誡詞已經沿用接近二十年，唔建議作出任何變動。
阿涂睇完警方嘅回應之後照舊好勞氣，強調佢提出嘅只係初步建議，如果覺得有問題或者好難背，可以再作出微調，唔應該一口否定話唔會改，佢仲話一定會繼續死纏爛打，追瘦警方。