政情：留學華人郭氏兄弟最疊水
人人都話浸過鹹水返嚟係唔同啲，美國財經雜誌《福布斯》中文版最近統計過曾經出外留學嘅華人邊個最「疊水」，結果留學英美嘅郭氏兄弟排名最高，身家有二百億美元（約一千五百六十億港元），喺全球華人富豪榜排名第二。緊接係留學美國嘅百度李彥宏及啱啱入股無綫嘅台灣富商、台塑集團董事長王永慶二千金—王雪紅及夫婿陳文琦，全球排第五同第八。同時喺美國留學嘅利豐主席馮國經及偉易達主席黃子欣，則分別喺華人富豪榜排名三十四及一百七十三。
不過論實際身家，華人社會裏面前三甲都係由香港富豪包攬，長和系主席李嘉誠以二百六十億美元（即約二千零二十億港元）身家居首，緊接係新鴻基嘅郭炳江、郭炳聯兄弟，恒基兆業主席李兆基「四叔」則以一百九十億美元身家（即約一千四百八十億港元）排第三。
今年華人富豪榜共有二百一十三個華人富豪上榜，估計財富總值高逾五千六百多億美元，佔全球億萬富豪財富總量嘅一成三，僅次於美國。當中內地富翁最多，佔逾半排名，香港居第二。