政情：廣播處長空櫈無人爭坐
前商務及經濟發展局局長劉吳惠蘭辭官醫病，大家都好關注邊個會接佢棒，不過與此同時，由商經局負責嘅香港電台，一樣未有搵到話事人。自從前廣播處長黃華麒喺今年二月約滿後突然決定唔續約就走人後，佢個空缺就由副處長梁松泰署任，而早喺舊年十二月已經開始嘅招聘工作，搞到依家都無乜進展。最近我哋聽到獵頭公司竟然搵一位唔識睇、更加係唔識寫中文嘅外籍人士做廣播處長，可見招募工作困難重重。
應徵廣播處長嘅期限，經已喺今年一月十八日屆滿，屈指一算，截止申請咗足足三個月有多，商經局方面話，總共收到廿六份申請，當中包括晒自行申請同埋獵頭公司交嚟嘅人選，家陣佢哋仲喺度處理緊，總之就希望盡快搞掂。講白啲，今次招聘並無時間表。
就喺政府處理緊啲申請嘅時候，我哋聽聞四周圍搵人嘅獵頭公司，就連本身係資深傳媒人，但唔識睇、唔識寫中文嘅外籍人士都去探吓聲氣，問佢有冇興趣做廣播處長，據知對方當場就回絕獵頭公司嘅「好意」。搵不諳中文嘅人做廣播處長，唔係講笑，就一定係大整蠱！
政府最近兩次招聘廣播處長，都無再規定要有大學學位，我哋問過早幾年因為規定要有大學學位而大發雷霆嘅傳媒人周融，佢話今次無申請啦，至於有無獵頭公司嚟向佢招手，佢只係話「無關係啦，我都無申請過。」弔詭嘅係，依家署任緊副廣播處長嘅戴健文一直都表現得對份工好有興趣，但係偏偏未能成為佢嘅囊中物，造物弄人莫過於此。我哋問過戴健文，佢話坐邊個位都係咁做，做處長更加多嘢做添，「你估唔使做咩？」似乎等得有啲唔耐煩喎。
最好冇女朋友？
由此可見，大家可以睇到呢個夕陽政府想搵人加盟有幾咁困難。咁就梗係啦，港台本身就問題多多，又有意識形態嘅問題，連麒伯都做到心臟有事，可見呢份工唔易做，有料嘅人倒不如打其他工好過，不必如此挑戰自己。不過就有人講笑話，搵廣播處長，最好就冇女朋友，否則又發生前處長朱培慶與「女友」CoCo把臂同遊被撞破事件，就真係攞嚟搞嘞。