中環出更：彭徐美雲擔起女童軍大旗
名媛彭徐美雲尋日正式上任女童軍總會香港總監。彭太低調返總部履新，四圍同員工打招呼。卓妮想搵佢講幾句感想，點知彭太話唔想太高調，遲啲廣發英雄帖，至同傳媒老友見面。
李周美枝親到賀
彭太上星期四其實已喺「香港總監移交儀式」上接棒，嬌滴滴嘅佢接過一支比佢仲要高嘅總監旗。當日到賀名人唔少，除女童軍總會副會長陳唐芷青、副總監蔡關穎琴外，仲有多位名譽副會長及各地方協會會長。最Sweet嘅，當然係彭太老公彭曉明親自嚟撐老婆喇。就連早前有份同佢拗手瓜競逐總監一職嘅國際事務總監兼前東華三院主席李三元太太李周美枝，都嚟恭喜佢。
呢場總監爭奪戰，曾掀起滿城風雨。皆因有人發匿名信去報館，踢爆前香港總監邊陳之娟係超齡總監，「夠鐘」退位，一度傳出女童軍有「金手指」，令人覺得女童軍總會原來咁亂。擾攘一輪後，女童軍破天荒以選舉方式解決，彭太最終當選。如今雨過天青，彭太領軍功力有幾深厚，真係要拭目以待嘞。
卓妮