中環出更：李國棟孖周永健睇學友騷
音樂嘅療效勝於唔少良藥，相信馬會大董兼世界家庭醫生學會亞太區主席李國棟醫生最明白呢個道理，所以佢同太太經常周圍去欣賞音樂會，無論古典、現代或流行曲都啱聽。前日佢又同太太拍拖去紅館撐歌神張學友，同行仲有馬會大董周永健律師同埋太太胡慕芳，四人齊齊化身學友嘅資深粉絲，隨着聽出耳油嘅旋律，重溫唔少昔日快樂時光添！
前日卓妮先喺馬場見到李醫生，問佢復活節去邊度玩，李醫生好興奮咁話，晚上要去聽學友演唱會，呢個就係復活節最正嘅節目喇！佢仲自爆同馬會大董周永健律師一齊去，卓妮夜晚去紅館睇吓實況，結果真係見到呢兩對恩愛夫妻齊齊現身。
獲歌神贈貴賓飛
李醫生話，佢由學友出道就開始捧場，對佢啲歌耳熟能詳，可謂係忠實擁躉。有咁知名嘅超級粉絲，學友梗知道，所以今次舉行二份一世紀巡迴演唱會，學友好識做咁送上免費嘅貴賓飛畀佢。
卓妮唔止一次喺音樂會撞到李醫生，除咗流行音樂之外，古典同埋現代音樂，佢同太太都好鍾意聽，係音樂會嘅常客。李醫生係家庭醫學專科醫生，佢講過今時今日嘅家庭醫生已經唔止開藥醫病咁簡單，仲要做到全人治療。計卓妮話，香港人嘅情緒病愈嚟愈普遍，聽吓音樂減壓都好重要㗎！
周永健同太太胡慕芳都係學友粉絲，眾所周知，周永健係唱得之人，四十年前，佢曾經同歌壇長青樹譚詠麟一齊夾Band。去年仲搵返當年夾Band舊相，重溫年少輕狂嘅歲月。如果佢唔做律師，話唔定樂壇就多咗粒巨星㗎！
卓妮