政情：張國柱退會句句有骨
工商界想拖死《競爭條例草案》早已係公開嘅秘密，包括不停喺議會內外大呻中小企嘅難處同草案內嘅技術問題，負責審議競爭法嘅立法會草案委員會，審議進度慢過蝸牛。委員會四十委員當中，至今已有十分一、即四名委員先後頂唔順退出，社福界張國柱寫信退會，仲句句有骨。
最新申請退會嘅社福界議員張國柱喺寫畀委員會主席梁君彥封信中大講反話，不點名寸爆以梁君彥為首嘅一眾工商界委員玩拉布。阿柱聲言喺主席帶領同各委員嘅「盡心參與」下，委員會工作「進度理想」，佢喺大家嘅「細緻討論」中亦「獲益良多」，但鑑於佢仲有好多其他工作做，委員會現已「人才濟濟」，主席又「領導有方」，佢「幾經思量，權衡利弊」後，都係決定退會唔玩落去喇！真係寫得好有技巧。
阿柱退會後，會內嘅工商界勢力進一步坐大。加上商務及經濟發展局局長劉吳惠蘭已因病辭職，委員會嘅討論隨時得個吉。