政情：侵犯私隱議員火滾
立法會政制事務委員會尋日討論《個人資料（私隱）條例》檢討報告，報告提到好多促銷電話根本係亂咁打出，連收電話嘅人姓乜都唔知，因此唔涉及個人資料或者侵犯私隱，唔屬於政制及內地事務局範疇，會繼續交畀規管一般商業活動嘅商務及經濟發展局處理。
呢個答案令民建聯議員黃定光相當火滾，佢投訴依家啲促銷電話愈嚟愈多，喺立法會開一陣會都隨時會收到幾個，而且打電話嘅人亦愈嚟愈狡猾，故意用啲冇來電顯示嘅電話，或者用有來電顯示嘅電話打嚟響一下就收線，再引你上當打番畀對方，各政策局應該加強合作堵塞法例漏洞，而唔係互相卸責推嚟推去。
公民起動議員何秀蘭自爆曾被盜用個人資料、甚至有刑事詐騙成分嘅經歷，話曾經有人利用佢個名同好多街坊都知道嘅手提電話號碼，做擔保人周圍借錢，最後搞到佢畀人追數，好彩佢一撻自己係立法會議員個朵，對方就知驚收手冇再追究。