政情：沈祖堯唔覺意踩親「膠樽義」

事緣有同學仔要求喺校園增設飲水機，沈祖堯口快快，話希望中大無膠樽。膠樽係學生幫前任校長劉遵義起嘅花名，沈校長此語一出，隨即刺激到現場一眾同學嘅神經，沈校長怕大家諗錯隔籬連忙補充：「我講嘅係希望校園少啲樽裝水，環保啲！」原來校長同學生都係用緊同一種嘅語言！

其實沈校長上場以來自製好多場合同學生聚首，例如喺校長府邸搞BBQ，尋日歷時一個半小時嘅「校長會見同學」公開論壇，學生反而未見好踴躍，坐足全程僅有十多人。

爆料火車站加出入口

校長又喺會上爆料，話三三四學制令學生增多，校方將與港鐵配合喺大學火車站增加多一個出入口疏導人潮，工程預計明年第三季完工。不過喺佢上任前鬧得沸沸揚揚嘅新民主女神像嘅永久安放位置，佢就話一切仲要同學生傾，依家未有定案。