政情：收緊高官再就業D姐一味拖

喺尋日嘅立法會公務員事務委員會會議上，D姐又畀議員「追債」，問佢究竟改善規管退休高官再就業制度幾時先面世。D姐尋日上立法會本來係討論其他事情，但議員又點會放過梁展文呢個咁紅嘅議題？民主黨黃成智首先逼迫D姐交貨，已解散嘅調查梁展文事件專責委員會主席李鳳英亦加把口，連事務委員會主席葉劉淑儀亦發警示，下個月十六日就要開會啦﹗

一臉愁容 仲未解決

避無可避嘅D姐，一臉愁容咁承認的確係答應立法會第二季作出交代，但依家仲研究緊法律意見，事關問題涉及退休高官就業權利外，仲涉及《基本法》同人權法，所以「今日講唔定」下月十六日交唔交到文件。其實政府為咗梁展文事件成立嘅檢討委員會以及立法會專責委員會，先後喺○九年中同舊年底發表報告，內含不少建議，只係D姐一直話要研究法律問題而遲遲未解決。

佢嘅前同僚葉太一聽到D姐講到法律問題，即時插嘴話「你催吓啲律師啦，啲報告發表咗咁耐」，仲話「你做局長你劃條線啦﹗今日已經係第二季，四月已經係第二季﹗」甚為無癮嘅D姐惟有推搪當然可以下個月傾，但若果到時政府都未做決定，盞變咗「學術性討論」，總之得就五月交文件，唔得都希望六月交啦﹗議員們惟有再等。

十字路口 搖擺不定

其實D姐所謂嘅法律問題都唔係今日先有，早喺○四年前房屋署副署長鍾麗幗事件後，政府決定收緊退休高官再就業制度時已經要考慮。到咗依家老問題復發，仲發得嚴重過上次，令素來愛錫公務員隊伍嘅D姐，站在公眾利益同公務員軍心嘅十字路口上顯得搖擺不定，不知如何是好，可以做嘅咪就係大耍拖字訣，最好拖到下屆政府先處理，到時就乾手淨腳。

所以話梁展文真係累街坊，不但退休高官再就業嘅規限因為佢而要收緊，D姐批准梁展文加入新世界中國，成為抹不去嘅污點，佢本來有機會更上層樓喺下屆政府做政務司司長，亦都斷送咗。