中環出更：過來人梁愛詩慰問Rita劉
前商務及經濟發展局局長劉吳惠蘭（Rita）患腸癌而要辭官，不過幾年前同樣患腸癌嘅香港基本法委員會副主任梁愛詩，吉人天相唔使辭工養病，依家都仲成日見到佢現身公開場合，生活一樣咁忙碌。
尋日佢以樂施會董事局成員身份，現身幫樂施會推廣樂施米義賣活動。詩姐同卓妮講，佢知道Rita患病後，有打電話同佢交流心得，至於係咪教佢食得清淡啲及如何照顧好自己身體，詩姐就無詳細講。佢話近年自己身體唔錯，飲食習慣同平時差唔多，唔使食素咁緊張。如果到時得閒嘅話，佢都會參加下個月樂施會賣米活動添！
永亨銀行董事長兼行政總裁馮鈺斌都在場，佢好認同樂施會扶貧路線，所以五年前主動聯絡佢哋，自此成為樂施會嘅重要捐助機構，仲攞過義賣樂施米嘅冠軍獎項添！
講起高官頻頻患病，今個月六日突然入院做預防性手術嘅中央政策組首席顧問劉兆佳，如期於尋日放完病假首日返工。與同樣做預防性手術嘅政制及內地事務局局長林瑞麟高調復工相比，劉兆佳就選擇低調，究竟佢患咩病？傳聞係前列腺手術，相信普羅市民都同卓妮一樣，好想知道真相。