政情：林D9通完波仔焗戒口
政制及內地事務局局長林瑞麟（林D9）上星期極速「通波仔」出院，前後計埋請得一日假，感冒都冇好得咁快。外間有傳聞話林D9為咗自己政治前途更上一層樓，扮演到神采飛揚，究竟係咪真就冇人知，但最近有接觸過佢嘅立法會議員就話，林D9戒口戒得好清淡，希望盡量減低膽固醇喎！
經濟動力（4L）幾個議員尋日同林D9一齊食晏，雖然只係西餐廳嘅普通午餐，但林D9都唔敢亂食嘢。好似頭盤個凍肉沙律，佢就挑走晒啲凍肉，就連主菜都只係食魚。到甜品時間，林D9對住雪糕望而卻步，淨係敢食鋪喺碟邊嘅藍莓。
4L諗住再約林D9一齊食飯，林D9都話要謝絕應酬，實行減少病從口入嘅機會。
據講呢餐飯係喺林D9入院前約定，原本諗住彼此交流下，點知尋日就變咗健康座談會，大家齊齊研究點樣減低膽固醇。林D9嘅心得就係食少啲紅肉同行多啲樓梯做運動，4L就有人反建議林D9要飲多啲紅酒，有助降膽固醇喎。