政情：毓民大舊支持派錢甩轆
班泛民主派把口就鬧爆派錢六千元措施短視兼分化社會，但為免得罪選民，最後竟無一個人夠膽投票反對政府派錢嘅預算案修訂，向來逢政府必反嘅人民力量，更宣稱佢哋係首個旗幟鮮明要求港府直接派錢嘅政團，表明會喺今日歷史性投票支持政府，可惜最終都係甩轆無投票收場。
人民力量嘅黃毓民同陳偉業（大舊）事後解釋，佢哋分別係因為搵唔到位泊車及趕唔切喺大嶼山出中環，導致不幸缺席投票，又話估唔到尋日咁快就輪到表決有關修訂，令佢哋錯失咗呢次千載難逢嘅撐政府機會。後來輪到佢哋提出剔除整個政制及內地事務局開支嘅修訂，佢哋又咁啱唔喺會議廳，變相放生該局局長林瑞麟。一來一回又係益番政府，算係打個和喇！
大舊嘅甩轆嘢原來仲未完結，話說佢同毓民晨早定好喺今晚飛去美加演講，點知大舊最後訂錯機票，變咗要喺尋晚起程，令佢被迫撤回其中幾條要求剔除副局長同政治助理薪酬嘅修訂，總之連番甩甩漏漏啦！