中環耳目：林健鋒最愛Cipriani海鮮午餐
辛苦搵來自在食，幾忙都好，飲食點都要對自己好啲。立法會議員林健鋒（Jeffrey）好識歎，無論幾忙都好，晏晝嗰餐點都要搵個好地方開餐，佢已食遍中環金鐘一帶，佢嘅「飯堂」除咗香港會所外，仲有銀行街舊中國銀行大廈嘅意大利餐廳Cipriani（斯比安利），貪夠就腳之餘，食物又有質素。
魚湯富層次感
意大利Cipriani海鮮聞名於世，當然有唔少海鮮入饌嘅菜式，好似Jeffrey最愛嘅Traditional Fish Soup（魚湯），整塊魚柳加上鮮蝦做伴，海鮮味濃郁之餘，令魚湯嘅味道層次豐富多變，配埋餐廳自家製麵包可謂相得益彰。
至於主菜同樣係海鮮嘅蜆肉意粉，鮮甜味美嘅蜆肉當然不用多介紹，充滿蜆肉海水鮮味嘅意粉，口感較硬，做法很貼近正宗嘅意大利煮法。當然，配埋朱古力蛋糕正好為呢餐畫上完美句號。提提大家，如果要品嘗Cipriani佳餚，就要做佢哋會員喇。
