中環出更：社企花生騷名媛靚太捧場
位於中環嘅中華總商會平時有好多西裝筆挺嘅大孖沙出沒，但尋晚就換上打扮靚靚嘅闊太名媛，令中總會所衣香鬢影。場面之所以咁墟冚，事關由潮州商會永遠名譽會長莊學山及胞弟莊學熹投資嘅社企時裝品牌「L Plus H」，舉行成立以來嘅首次時裝騷，展示最新春夏系列時裝，吸引靚太蜂擁到場湊熱鬧，尋覓心頭好。
「玩具大王」旭日國際主席蔡志明太太蔡李惠莉，約埋遠東發展副主席邱達昌太太邱吳惠平一齊現身，佢哋不約而同手挽唔同款式嘅Hermes桃紅色靚袋，兩姊妹有幾啱傾可見一斑。蔡太仲未幫襯過「L Plus H」，睇完騷之後，卓妮問佢有冇心水，佢好興奮大讚啲衫顏色好鮮艷，好鍾意其中一款橙色嘅針織條紋外套，遲啲會去「L Plus H」位於中環士丹利街嘅樓上舖睇真啲。
莊氏三兄弟招呼賓客
今次花生騷由中總旗下嘅「愛心行動委員會」贊助，雖然唔見會長蔡冠深蒲頭，但貪靚嘅蔡太蔡關穎琴就全力支持，佢唔止現身睇騷，仲睇中好多靚衫，完騷後仲即時入後台試衫，認真唔話得。婦協主席林貝聿嘉都好有心，特登着咗件「L Plus H」綠色針織衫嚟撐場，同喺台上行貓步嘅模特兒Cara G.撞衫都唔介意。
「L Plus H」係莊氏兄弟回饋社會嘅心血，所以莊學山、莊學海同埋莊學熹三兄弟齊現身招呼賓客，佢哋嘅太太更加親力親為張羅打點。擔任「L Plus H」創辦人嘅莊學熹話，今次佢哋特登搵城中著名時裝設計師Liza T.合作推出「After Five Collection」限量時裝，未來佢哋將會搵唔同設計師合作，每一季推出唔同嘅聯名系列時裝，為追求時尚嘅女士提供優質嘅百分百香港製造高檔時裝。
卓妮