政情：許細文捐肝兄姊支援
畀人叫「捐肝英雄」嘅海關督察許細文Simon低調養傷，早前卻突然喺前理大校長潘宗光嘅演講中，以神秘嘉賓身份出現，全場哄動。原來潘教授今次嘅講題係「應所住而生其心」，講題出自《金剛經》，意謂無所執着，佢認為Simon係「無所住」嘅最佳典範，所以請佢做嘉賓。咁又係，Simon當日冒生命危險捨肝救人，仲唔係「唔執着」！Simon係佛教徒，但仲未正式皈依，遲吓至進行儀式。
佢最近接受佛教刊物《溫暖人間》訪問，講到家人嘅支持時眼濕濕，佢話捐肝後傷口好大，郁吓都痛，結果佢大哥幫佢洗頭、二哥幫佢按摩、四哥幫佢沖涼，其後三姐更接Simon返佢屋企住，陪散步、煲靚粥、洗傷口、換紗布，一家都熱血，難怪Simon咁有愛心。之後海關亦安排鐘點家傭幫佢做家務，不過Simon話自己係「住家男」，都係鍾意自己做家務，依家已親手執屋。佢仲話，一手包辦十幾人嘅筵席都無問題。