政情：星屑醫生示威變買金
美孚新邨居民反對發展商喺第八期起屏風樓嘅抗爭行動繼續升級，尋日更動員到與新世界同系嘅周大福珠寶門前抗議。選民力量成員「星屑醫生」歐陽英傑尋日亦有份參與示威行動，不過佢口講要抵抗「地產霸權」嘅同時，轉個頭竟然又入店內買金飾，認真反高潮。
幾十名美孚居民到達該珠寶店門外示威，星屑醫生嗌完一輪口號後，即同一班示威者衝入店內。正當人人以為佢哋要入內搞事之際，星屑醫生竟然施施然坐低睇金飾，最後更拍板用八百蚊，買咗一隻狗仔足金電話繩，在場職員都唔知點反應。
星屑醫生話，佢打算將呢隻金飾狗仔送畀人民力量立法會議員黃毓民，賀佢位於李鄭屋邨嘅議員辦事處尋日正式開幕。佢更喺賀卡上寫上「狗尾向西，民協歸西」嘅字句，祝願毓民成功狙擊有意喺該區出選嘅民協議員馮檢基。星屑醫生喺金行外示威完，隨即入去買嘢補數，莫非係想證明自己唔係「搞搞震冇幫襯」？