政情：莫宜端謂湊仔當紓壓
商務及經濟發展局局長劉吳惠蘭因病請辭，再加上問責官員接二連三倒下，令高官嘅工作量頓成外界關注點。唔同人有唔同嘅減壓方式，近月備受最低工資議題「困擾」、工作量有增無減嘅勞工及福利局政治助理莫宜端就笑言，對佢嚟講，冇活動比湊仔更能紓壓。
莫宜端尋日抽空出席C18搞嘅「健康家庭開心日」，仲帶領一眾市民做健身操。作為雙職媽媽嘅佢直言，自己工作量沉重，相信短時間之內都冇機會追多個。佢又話，加入政府後工作壓力好大，好彩有家人同埋教會嘅支持，而湊仔更能將佢嘅工作壓力一掃而空。
政制及內地事務局局長林瑞麟（林D9）早前突然入院通波仔，該局副局長黃靜文尋日就話，自己有定期做身體檢查，每個月亦至少打三次高球「強身」。佢直言林D9做完手術後情況良好，相信未來同佢嘅分工唔會有任何大改變，但問到佢有冇做好心理準備隨時「坐正」，佢就面露尷尬之色，顧左右而言他。