政情：選情告急四大Q王發問造勢
選舉年殺到，唔少有志之士已經磨刀霍霍，希望爭番一席之位。一班現任議員唔知係咪擔心長江後浪推前浪，個個都唔敢鬆懈，我哋睇番今屆立法會嘅質詢統計，發現今年好多議員都好踴躍發問，有四個議員齊齊成為「質詢王」，各提咗十四次書面或口頭質詢，唔通佢哋係感覺到有選舉危機，所以狂發問以示自己有做嘢？
根據立法會上星期嘅最新統計，四個「質詢王」分別係民主黨甘乃威、旅遊界謝偉俊（Paul）、社民連梁國雄（長毛）同社福界張國柱。眼利嘅朋友就會發現，甘威同阿Paul來年嘅選情一啲都唔樂觀，好似甘威咁，上年捲入涉嫌求愛不遂怒炒女助理風波，調查佢嘅委員會預計暑假出報告，時間啱啱就喺區議會選舉前夕，成為對手打擊佢嘅最佳彈藥，餘波會唔會蔓延至出年立會選舉就不得而知，但該黨副主席單仲偕有意喺港島出選，到時甘威要面對內外夾擊，真係唔知點算。
至於旅遊界就仲混亂，阿Paul○八年只係僅僅贏對手旅遊業議會總幹事董耀中九票險勝，但最近有菲律賓人質事件、本地惡導遊同日本核危機問題，業界個個牙痛咁聲，選舉氣氛可謂非常緊張。加上董耀中至今仍野心勃勃，阿Paul如果想順利連任，真係要畀多兩錢肉緊先得。
橄欖變零質詢議員
雖然好多人努力問問題，但唔代表其他人會因而受感染，好似體育演藝文化及出版界霍震霆同中總黃宜弘咁，就由上年十月到依家一條問題都冇問過，不過根據兩個人過去喺立法會嘅表現，相信大家都見怪不怪。最令人摸不着頭腦嘅係，民建聯陳鑑林（橄欖）都係零質詢議員，我哋問番橄欖點解偷懶，佢就大聲呼冤，話佢曾經抽中口頭質詢，不過黨友有緊急問題要問先讓咗畀人，唔係存心唔提問喎！橄欖又話嚟緊會繼續跟進八達通出賣港人個人私隱資料嘅問題，繼續履行議員責任。不過橄欖扎根九龍東咁多年，票源穩定，就算問少幾條問題都唔怕連任唔到啦！