中環出更：陳智思競步呻對手太茅
港鐵尋朝舉行競步賽，一千六百名競步健兒齊集中環遮打道拗手瓜，重頭戲係港鐵主席邀請賽，逾四十位政商界名人同港鐵主席錢果豐一齊較量。前年得第二嘅前行政會議成員陳智思（Bernard）係老手，但今年狀態失準，僅得梗頸四。Bernard解釋話，好多人急步跑，唔係競步，唔守規矩喎。
競步賽新丁老手雲集，醫管局主席胡定旭同行政會議成員梁智鴻參賽經驗豐富，競起步嚟氣唔喘，腳唔軟；醫管局行政總裁梁栢賢同立法會議員林健鋒係新丁，落場都唔失禮。
仲裁後升梗頸四
比賽最後由百仁基金副主席吳宗權勝出，新民黨副主席史泰祖得第二，置地集團總裁彭耀佳得第三，Bernard本來跑第十，經仲裁後剔走犯規人士，由第十名急升上第四名，Bernard高舉勝利手勢話：「呢個世界有公義嘅。」但保唔住三甲寶座，有啲失威。
商務及經濟發展局局長劉吳惠蘭因癌病辭職，運輸及房屋局局長鄭汝樺上台致辭時，借題發揮，佢話健康最重要，朝早打完網球先嚟競步賽。議員馮檢基就每日堅持跑步一粒鐘，話病痛都少啲喎。