中環出更：杜振源開P歎人氣拉麵
日日搞到蘭桂坊和安里大排長龍嘅麵店「豚王」，尋日畀滙豐亞太區行政總裁王冬勝、前經濟發展及勞工局局長葉澍堃、「公職王」王英偉、南太電子集團創辦人顧明均及名醫梁宗存等名人包圍。
免老友排隊之苦
嚟得呢度食麵，未祭五臟廟，要先考腳骨力，閒閒地要排隊一粒鐘。今次佢哋企一陣就可以入席，全靠「文具大王」杜振源嘅細心安排。
要歎「豚王」，必先排隊，試問有幾多個繁忙都市人負擔得起咁「矜貴」嘅麵食，所以公司喺葵涌嘅杜振源，就搵咗老友兼「豚王」老闆之父鄧慶治幫手，搞今次嘅拉麵派對，等老友同同事食好嘢。首次到訪嘅王冬勝大讚呢度嘅出品無令佢失望。前日先食完日本菜嘅佢對和食無有怕，依家日本經濟正在重建中，王生話最重要員工平安，經濟要畀時間佢哋復甦，佢哋嗰邊嘅業務好正常，難怪王生食麵食得咁輕鬆啦。
個個都食得好滋味，唯獨正在減肥中嘅立法會議員石禮謙有得睇無得食，大舊石好忍得，面對陣陣麵香都把持得住，只輕嘗細心嘅葉澍堃太太遞畀佢嘅紫菜。講開又講，「豚王」星期日休息，身為老闆嘅鄧慶治囝囝鄧振豪話，舖頭尋日為杜生而開，所有收益會捐畀日本，下星期日佢哋會再義賣一日饗老饕，振豪話主廚依家喺仙台煮麵慰災民，佢哋喺香港當然都要越洋支持啦。
