中環出更：Tim霍現身濠江睇打吡撐澳博
賭王何鴻燊分產事件塵埃落定，一切又回復正常，澳門馬場尋日舉行澳博盃賽，身為澳博執行董事嘅立法會議員霍震霆（Tim）都畀面撐場。澳博執行董事四太梁安琪話，Tim係澳博執行董事，澳博搞活動，佢當然支持。
話說澳門四季酒店前晚衣香鬢影，四太帶埋剛剛落機嘅囝囝何猷亨出席《Macau Tatler》第三屆周年舞會，霍震霆孖啟剛、啟山到場，行政會議成員梁智鴻太太亦由啱啱返香港嘅囝囝Eric作舞伴。
澳博去年勁賺近三十五點六億元，四太喺澳博地位更見穩固，前晚佢同澳博行政總裁蘇樹輝都有出席晚會，加埋Tim，澳博咁多高層聚頭，莫非有嘢傾？Tim笑笑口話只係嚟食餐飯，點知尋日又見佢現身澳門馬場。蘇樹輝話，前晚喺晚宴上見到Tim，所以請佢去睇澳博澳門打吡同新葡京盃，佢一口答應，四太亦話同Tim關係一向好好，加上對方係澳博執行董事，梗要嚟支持。
四太話結婚周年毋須慶祝
分產事件後，四太喺賭王心目中嘅地位唔使講。問佢點同賭王慶祝結婚紀念日，佢笑笑口反問幾時有見過佢做呢啲嘢，仲話無咁嘅需要，因為日日都係結婚周年，仲話自己嘅「專科」係跳舞，乜音樂都跳到，會同賭王跳舞當運動。
商務及經濟發展局局長劉吳惠蘭腸癌要辭職，提醒各大忙人都要注意健康，Tim對於自己嘅健康抱輕鬆態度，佢話已經好耐無做體檢嘞，間中會打吓網球做運動，仲笑言去Ball就係想食餐好，相信幽默都係Tim嘅養生之道。
卓妮