民協近年黨內糾紛可謂浪接浪，繼前黨友官世亮因為穿櫃桶底被革出黨後，佢哋亦將要與另一位前黨友對簿公堂。我哋早前講過，前民協成員、深水埗區議員甄啟榮曾經喺○八年立法會選舉幫梁美芬助選，因而被人唱佢同建制派關係曖昧，民協仲唱佢已加入鼠王芬發起嘅「西九新動力」，甄啟榮近日進行絕地大反擊，發律師信告民協誹謗。
甄啟榮尋日發表聲明，強調冇加入「西九新動力」，仲話自己修讀法律時同鼠王芬識於微時，助選後已無任何關聯。佢話，原本佢畀人唱都諗過當無事算數，但自從佢退黨後，民協不斷喺地區「追殺」佢，並向街坊派單張老屈佢已加入「西九新動力」，又派人喺佢辦事處門外搞健康檢查等地區工作，擺明踩場，佢惟有訴諸法律行動。
民協立法會議員馮檢基對甄啟榮向傳媒爆大鑊，顯然感到唔多高興，斥對方既然已透過法律處理事件，如今又公開件事，明顯係想煲大自己、抹黑民協。至於甄啟榮係咪真係「西九新動力」成員，佢就話要視乎「成員」嘅定義喎！