政情：沈詩鈞伯樂嘆日子快過
一手招攬九歲神童沈詩鈞入浸會大學嘅前浸大教務長唐創時，本月一日正式履新做香港考試及評核局秘書長，呢位咁破格嘅新任秘書長，坦言返咗一個星期工，已感覺時間好似返咗一日咁快過，日子過得好充實。啱啱上工就覺時間過得快，工作量有幾忙可想而知，難怪佢預期遲啲會覺得度年如日喇。
近期高考開始，但公開試聆聽試場就因為收音差，搞到高考生要逃亡去特別室考試。見慣風浪嘅唐秘書就處變不驚，仲已經落區去試場實地考察，睇咗通訊及支援中心嘅運作，佢話考試最緊要就係要公平公道，考評局會不斷做到最好。
唐秘書長又主動申報利益，話佢十五歲囡囡將會係第二屆新高中學生，知道考評局有好嚴謹嘅機制，所以一早向局方申報，確保冇利益輸送。記得佢上任前，都話要為考評局打造全新開放形象，增加考評局的透明度，睇嚟佢真係好積極兌現呢張上任前嘅期票喎！